ချင်းပြည်နယ်အတွင်းက ပလက်ဝမြို့နယ်ကို ရခိုင်ပြည်နယ်ရဲ့ ခရိုင်တစ်ခုအဖြစ် အာရက္ခတပ်တော် (AA) က ထည့်သွင်းခြင်းအပေါ် Global Khumi Organization (GKO) နဲ့ နိုင်ငံတကာခူမီးလူငယများအသင်း (GKYA) တို့က ပြင်းထန်စွာ ကန့်ကွက်တယ်လို့ ဩဂုတ် ၁၂ ရက်မှာ ထုတ်ပြန်ပါတယ်။
၂၀၂၅ ခုနှစ်၊ ဇူလိုင် ၁၁ ရက်နေ့က ရခိုင်ပြည် အခြေစိုက် သတင်းမီဒီယာတစ်ခုဖြစ်တဲ့ Narinjara မှ ပလက်ဝမြို့နယ်ကို ရခိုင်ပြည်နယ်ရဲ့ ခရိုင်တစ်ခုအဖြစ် ထည့်သွင်းကြောင်း ဖော်ပြခဲ့တယ်လို့ ဆိုပါတယ်။
အလားတူ ဩဂုတ် ၁၁ ရက်နေ့မှာ AA ရဲ့ ပြောခွင့်ရ ဦးခိုင်သုခမှ ပလက်ဝမြို့နယ်ကို ရခိုင်ပြည်နယ်ရဲ့ တရားဝင်ခရိုင်တစ်ခုအဖြစ် ထည့်သွင်းကြောင်း ထပ်မံအတည်ပြုခဲ့တယ်လို့ ဆိုပါတယ်။
ပလက်ဝပြည်သူလူထုတွေဟာ အာရက္ခပြည်သူ့အစိုးရရဲ့ ပလက်ဝနဲ့ ပတ်သက်တဲ့ နိုင်ငံရေးရပ်တည်ချက်နဲ့ အုပ်ချုပ်ရေးယန္တယား အကောင်အထည်ဖော် ဆောင်ရွက်မှုကို မည်သည့်အခါမှ လက်ခံခြင်း မရှိဘူးလို့ ဆိုပါတယ်။
စစ်အာဏာရှင်စနစ်ကို ဆန့်ကျင်တဲ့ နွေဦးတော်လှန်ရေးရဲ့ အရှိန်အဝါကို အကြောင်းပြု၍ ဒေသခံဌာနေချင်းတိုင်းရင်းသားရဲ့ သဘောထားဆန္ဒမပါဘဲ အခုလို သတ်မှတ်လိုက်ခြင်းဟာ ဒေသခံရဲ့ နိုင်ငံရေးဖြစ်တည်မှုကို မျက်ကွယ်ပြုခြင်း ဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
ဒါ့အပြင် ပြည်ထောင်စုမြစ်ဖျားခံရာ ပင်လုံကတိကဝတ်စာချုပ်ပါ အချက်တွေ၊ ခေတ်အဆက်ဆက်မှာ ကျင့်သုံးခဲ့တဲ့ မြန်မာနိုင်ငံဖွဲ့စည်းပုံအခြေခံဥပဒေအရ တည်ရှိခဲ့တဲ့ ချင်းပြည်နယ် နယ်နိမိတ်နဲ့ ချင်းပြည်သူတစ်ရပ်လုံးရဲ့ သဘောထားဆန္ဒကိုလည်း ချိုးဖျက်ခြင်း ဖြစ်ပြီး အင်အားဗဟိုပြုတဲ့ ကိုလိုနီစနစ်တစ်ခုသာဖြစ်ကာ ဒီမိုကရေစီနဲ့ ဆန့်ကျင်နေတယ်လို့ ဆိုပါတယ်။
ပလက်ဝမြို့နယ်ကို AA ထိန်းချုပ်ပြီး ၁ နှစ်ကျော်ကာလအတွင်း လူသတ်မှု ၆ ကြိမ်၊ မုဒိမ်းမှု ၅ ကြိမ်ဖြစ်ပွားခဲ့ကြောင်း အဆိုပါ ဖြစ်စဉ်တွေနဲ့ ပတ်သက်၍ အမှုမှန်ပေါ်ပေါက်လာရေးအတွက် တစုံတရာ လုပ်ဆောင်ဖော်ထုတ်ခြင်း မရှိဘဲ ပလက်ဝမြို့နယ်အတွင်း တရားဥပဒေစိုးမိုးရေး အားကောင်းတယ်လို့ ဦးခိုင်သုခမှ ပြောဆိုခြင်းဟာ နွေဦးတော်လှန်ပြည်သူ တရပ်လုံးကို မဟုတ်မမှန်ဝါဒဖြန့်ချီခြင်း သက်သက်သာ ဖြစ်တယ်လို့ ဆိုပါတယ်။
ဒါကြောင့် ဩဂုတ် ၁၁ ရက်နေ့က ပြုလုပ်တဲ့ AA ရဲ့ (၁၀) ကြိမ်မြောက် သတင်းစာရှင်းလင်းပွဲမှာ ဖော်ပြခဲ့တဲ့ ပလက်ဝမြို့နယ်ကို ရခိုင်ပြည်နယ်ရဲ့ ခရိုင်တစ်ခုအဖြစ် တရားဝင်ပြောဆိုခြင်း၊ ပလက်ဝမြို့နယ်အတွင်း လူ့အခွင့်အရေးချိုးဖောက်မှုတွေမရှိဟု ငြင်းဆိုမှုကို မိမိတို့ ချင်းအဖွဲ့အစည်းက ပြင်းထန်စွာ ကန့်ကွက်တယ်လို့ ထုတ်ပြန်ချက်မှာ ဖော်ပြထားပါတယ်။
ပလက်ဝမြို့နယ်ကို အာရက္ခတပ်တော် (AA) က ၂၀၂၄ ခုနှစ်၊ ဇန်နဝါရီ ၁၄ ရက်မှာ တိုက်ခိုက်သိမ်းပိုက်ခဲ့ပြီး လက်ရှိမှာ အုပ်ချုပ်ရေးယန္တယားတွေ ထူထောင်လျက်ရှိနေတယ်လို့ သိရပါတယ်။
