ယာယီသမ္မတ ဦးမြင့်ဆွေ ကွယ်လွန်သွားတဲ့အပေါ် ဝမ်းနည်းကြောင်း “ဝ” ပြည် သွေးစည်းညီညွှတ်ရေးတပ်မတော် (UWSA/UWSP) က သဝဏ်လွှာ ပေးပို့ခဲ့ပါတယ်။
အာဏာသိမ်းပြီးနောက်ပိုင်း ယာယီသမ္မတအဖြစ် တာဝန်ယူခဲ့တဲ့ ဦးမြင့်ဆွေဟာ ဒီကနေ့ ဩဂုတ်လ ၇ ရက်၊ မနက် ၈ နာရီက အမှတ် (၂) တပ်မတော်ဆေးရုံကြီးမှာ ကွယ်လွန်သွားကြောင်း စစ်ကောင်စီရဲ့ သတင်းထုတ်ပြန်ရေးအဖွဲ့က အတည်ပြုထုတ်ပြန်လိုက်ပါတယ်။
“ပြည်ထောင်စုသမ္မတ မြန်မာနိုင်ငံတော် ယာယီသမ္မတ ဦးမြင့်ဆွေသည် ရောဂါဝေဒနာဖြင့် ကွယ်လွန် အနိစ္စရောက်သွားပြီ ဖြစ်ကြောင်း ကြားသိရတဲ့အတွက် လွန်စွာဝမ်းနည်းရကြောင်း၊ “ဝ” ပြည်သွေးစည်း ညီညွှတ်ရေးပါတီ၊ “ဝ” ပြည်နယ်အစိုးရ၊ “ဝ” ပြည်သွေးစည်း ညီညွှတ်ရေး တပ်မတော်၊ ပြည်သူလူထုအားလုံးမှ ကျန်ရစ်သူမိသားစုနဲ့အတူ ထပ်တူဝမ်းနည်းရကြောင်း” ပေးပို့တဲ့ သဝဏ်လွှာမှာ ဖော်ပြထားပါတယ်
ယာယီသမ္မတ ဦးမြင့်ဆွေ ကွယ်လွန်မှုအတွက် ဩဂုတ် ၇ ရက်မှ ၉ ရက်နေ့အထိ နိုင်ငံတော်အဆင့်ဝမ်းနည်းခြင်း အထိမ်းအမှတ်ကာလအဖြစ် သတ်မှတ်ကြောင်း ထုတ်ပြန်ထားပါတယ်။
၎င်းရဲ့ကျန်းမာရေးအခြေအနေမှာ အထူးစိုးရိမ်ဖွယ်ရာရှိနေပြီး ဆေးကုသမှုခံယူနေရတာဖြစ်တယ်လို့ ပြီးခဲ့တဲ့ ဩဂုတ် ၅ ရက် ညနေနပိုင်းက ထုတ်ပြန်ခဲ့ပြီးနောက် သြဂုတ် ၆ ရက် မနက် ၃ နာရီမှာ ကွယ်လွန်သွားပြီလို့ သတင်းတွေ ထွက်ပေါ်ခဲ့ပါတယ်။
အဆိုပါသတင်းနဲ့ ပတ်သက်ပြီး စစ်ကောင်စီရဲ့ ပြောခွင့်ရ ဗိုလ်ချုပ်ဇော်မင်းထွန်းက ငြင်းဆိုခဲ့ပြီးနောက် ဒီနေ့မနက်မှာတော့ အမှန်တကယ် သေဆုံးသွားကြောင်း အမျိုးသားကာကွယ်ရေးနှင့် လုံခြုံရေးကောင်စီက တရားဝင် သတင်းထုတ်ပြန်လာတာ ဖြစ်ပါတယ်။
စစ်ဗိုလ်ချုပ်ဟောင်းတစ်ဦးလည်းဖြစ် ယာယီသမ္မတလည်းဖြစ်တဲ့ ဦးမြင့်ဆွေဟာ ကွယ်လွန်ချိန်မှာ အသက် ၇၄ နှစ်ရှိပြီဖြစ်ပါတယ်။
