ရခိုင်ပြည်နယ်၊ ပေါက်တောမြို့နယ်မှာ ဇူလိုင် ၂၈ ရက်နေ့က အသက် ၉ နှစ်အရွယ် အမျိုးသမီးငယ်တစ်ဦးကို ဘုန်းတော်ကြီးတစ်ပါးက အဓမ္မပြုကျင့်မှု ဖြစ်ပွားခဲ့တယ်လို့ အာရက္ခတပ်တော် (AA) ရဲ့ တရားဥပဒေစိုးမိုးရေးနှင့် ပြည်သူ့လုံခြုံဌာန (DLEPS) တာဝန်ရှိသူတစ်ဦးက Arakan Princess Media ကို ပြောကြားထားပါတယ်။။
မုဒိမ်းမှုကျူးလွန်ခြင်းခံရသူဟာ ပေါက်တောမြို့နယ်၊ ဟင်းခရော်ရွာမှ အသက် (၉) နှစ်အရွယ် (၄) တန်းကျောင်းသူ မသဇင်ဖူး (နာမည်လွှဲ) ဖြစ်ကြောင်း သိရပါတယ်။
ဇူလိုင် ၂၈ ရက်နေ့ မနက်ပိုင်းက ရွာရှိ ဘုန်းတော်ကြီးကျောင်း ဓမ္မာရုံမှာ ကျောင်းတက်ပြီး ပြန်လာချိန် ငိုယိုနေတာကြောင့် မိခင်ဖြစ်သူ မေးမြန်းရာ ဘုန်းတော်ကြီးတစ်ပါးက အဓမ္မပြုကျင့်ခဲ့ကြောင်း မိခင်ဖြစ်သူကို ပြောပါတယ်။
ကျောင်းဆင်းချိန် ၁၀ နာရီခန့်မှာ ထီးမေ့ကျန်ခဲ့တာကြောင့် ဓမ္မာရုံအတွင်း ပြန်သွားယူချိန် စစ်တွေကနေ စစ်ရှောင်လာတဲ့ ဘုန်းတော်ကြီး စန္ဒိမာ (ခ) စိန်လှထွန်း (၆၉ နှစ်)က သူမကို အတင်းအဓမ္မ ဆွဲခေါ်၍ အဓမ္မပြုကျင့်ခဲ့ကြောင်း မိခင်ဖြစ်သူက ပြောပါတယ်။
ဖြစ်စဉ်ကို အကြောင်းစုံသိရှိရပြီးနောက် ဥပဒေအရ အရေးယူပေးဖို့ ဇူလိုင် ၂၉ ရက်မှာ အာရက္ခတပ်တော် (AA) ရဲ့ တရားဥပဒေစိုးမိုးရေးနှင့် ပြည်သူ့လုံခြုံဌာန (DLEPS) ထံ တိုင်းကြားခဲ့တယ်လို့ ဆိုပါတယ်။
တရားဥပဒေစိုးမိုးရေးနှင့် ပြည်သူ့လုံခြုံဌာန (DLEPS) က ကနဦး စုံစမ်းမှုတွေ ပြုလုပ်ပြီးနောက် သက်ဆိုင်ရာ မြို့နယ်သံဃာ့နာယကအဖွဲ့ တာဝန်ရှိသူတွေနဲ့အတူ လုပ်ထုံးလုပ်နည်းနဲ့အညီ စန္ဒိမာ (ခ) စိန်လှထွန်း ကို ဖမ်းဆီးထားတယ်လို့ ဆိုပါတယ်။
လက်ရှိမှာ အဓမ္မပြုကျင့်ခံရသူ မသဇင်ဖူး(နာမည်လွှဲ) ကို ဆီးစစ်ဖို့ ပို့ဆောင်ထားရှိပြီး စန္ဒိမာ (ခ) စိန်လှထွန်းကို သက်ဆိုင်ရာ DLEPS ဌာနမှ အမှုအမှတ် (ပ) ၁၇/၂၀၂၅ ပုဒ်မ- ၃၇၆ အရ အမှုဖွင့်အရေးယူဆောင်ရွက်လျက်ရှိတယ်လို့ ဆိုပါတယ်။
