စစ်ကိုင်းတိုင်းဒေသကြီး၊ ပုလဲမြို့နယ်ရှိ၊ ကန့်ဒေါင့်စခန်းသိမ်းတိုက်ပွဲအတွင်း ဖမ်းဆီးရမိတဲ့ စစ်သုံ့ပန်း ၄ ဦးကို ပြန်လွှတ်ပေးကြောင်း ပြည်သူ့လွတ်မြောက်ရေးတပ်မတော် (PLA) က သတင်းထုတ်ပြန်ပါတယ်။
တိုက်ပွဲအတွင်း ဖမ်းဆီးရမိတဲ့ ၅ ဦးအနက် တစ်ဦးမှာ ဖမ်းဆီးခံရချိန် ရောဂါနဲ့ ကွယ်လွန်သွားကြောင်း၊ တပ်သားတစ်ဦးမှာ အသက် ၁၅ နှစ်သာ ရှိသေးပြီး ရန်ကုန်မှာ အကင်ရောင်းနေစဉ် စစ်တပ်မှ ဖမ်းဆီးကာ တပ်ထဲထည့်ခဲ့တာကြောင့် စစ်တပ်ဟာ အသက်မပြည့်သေးတဲ့ ကလေးငယ်တွေကို ပေါ်တာဆွဲကာ လူအင်အားဖြည့်တင်းနေတယ်လို့ PLA ရဲ့ ထုတ်ပြန်ချက်မှာ ဖော်ပြထားပါတယ်။
PLA ဟာ စစ်မြေပြင်မှာ ဖမ်းဆီးရမိတဲ့ စစ်သုံ့ပန်းတွေကို လူသားဂုဏ်သိက္ခာ၊ စစ်သားဂုဏ်သိက္ခာနဲ့အညီ ဆက်ဆံကာ ကောင်းမွန်စွာထိန်းသိမ်းစောင့်လျှောက်လျက်ရှိကြောင်း ဆိုပါတယ်။
ဒါ့အပြင် ဒဏ်ရာရ သုံ့ပန်းတွေကိုလည်း ဆေးကုသပေးတာ၊ ကျန်းမာရေး စောင့်ရှောက်တာတွေ ပြုလုပ်ပေးတယ်လို့ PLA က ဆိုပါတယ်။
ရန်သူ့သုံ့ပန်းတွေကို ဗမာပြည်ကွန်မြူနစ်ပါတီ (ဗကေပ)ရဲ့ သုံ့ပန်းပေါ်လစီအတိုင်း ထိန်းသိမ်းပြီး ကောင်းမွန်စွာ ပြန်လွှတ်ပေးခြင်း ဖြစ်တယ်လို့ ထုတ်ပြန်ချက်မှာ ဖော်ပြပါတယ်။
စစ်သုံ့ပန်း ၄ ဦးကို ပြန်လွှတ်ပေးချိန်မှာ လမ်းစားရိတ်အနေနဲ့ တယောက်ကို တသိန်းကျပ်ဆီ ပေးခဲ့ကြောင်း၊ စစ်တပ်အတွက် တိုက်ခိုက်မနေဘဲ လက်နက်ချဖို့ PLA က ဆိုပါတယ်။
