သျှမ်းပြည်အရှေ့ပိုင်း၊ ကျိုင်းတုံမြို့နယ်မှာ သျှမ်းပြည်ပြန်လည်ထူထောင်ရေးကောင်စီ (RCSS/SSA) နဲ့ စစ်တပ်တို့ ဩဂုတ် ၂၈ ရက်က နှစ်ဖက်ထိတွေ့ တိုက်ပွဲဖြစ်ပွားခဲ့တယ်လို့ သျှမ်းပြည်အခြေစိုက် Hsan Loi Voice ဌာနက ဖော်ပြခဲ့ပါတယ်။
RCSS လှုပ်ရှားနယ်မြေအတွင်းသို့ မိုင်းယောင်းအခြေစိုက် ခမရ ၃၃၅ တပ်နဲ့ ပြည်သူ့စစ် ပူးပေါင်းအဖွဲ့ အင်အား ၁၀၀ ခန့်တို့က ဝင်ရောက်စစ်ကြောင်းထိုးမှုကြောင့် တိုက်ပွဲဖြစ်ပွားခဲ့ခြင်းဖြစ်တယ်လို့ ဆိုပါတယ်။
နှစ်ဖက်တိုက်ပွဲဖြစ်ပွားခဲ့ပြီးနောက် စစ်တပ်ဖက်က ၄ ဦး သေဆုံးကာ ၅ ဦး အပြင်းအထန် ဒဏ်ရာရရှိခဲ့ကြောင်း ဖော်ပြထားပြီး အဆိုပါ ကိစ္စရပ်နဲ့ ပတ်သက်၍ စစ်တပ်ဖက်က တစ်စုံတစ်ရာ ထုတ်ပြန်ခြင်း မရှိသေးပေ။
ပြီးခဲ့တဲ့ ၂၀၂၄ ခုနှစ် စက်တင်ဘာလအတွင်းကလည်း မိုင်းပျဥ်းမြို့နယ်၊ ယင်းခမ်းကျေးရွာအုပ်စုမှာ RCSS နဲ့ စစ်တပ်တို့ နှစ်ဖက်တိုက်ပွဲ ဖြစ်ပွားခဲ့ပြီး စစ်တပ်ဖက်က ၅ ဦး သေဆုံးမှုတွေ ရှိခဲ့တယ်လို့ ဆိုပါတယ်။
သျှမ်းပြည်ပြန်လည်ထူထောင်ရေးကောင်စီ (RCSS/SSA) ဟာ တစ်နိုင်ငံလုံး အပစ်အခတ်ရပ်စဲရေး သဘောတူစာချုပ် (NCA) လက်မှတ်ရေးထိုးထားတဲ့ သျှမ်းလက်နက်ကိုင်တပ်ဖွဲ့ဖြစ်ပါတယ်။
