စစ်ရေးတွေကို အရှိန်အဟုန်မြှင့် ဖော်ဆောင်သွားနိုင်ရေးအတွက် အမျိုးသားညီညွတ်ရေးအစိုးရ (NUG) ရဲ့ ကာကွယ်ရေး ဝန်ကြီးဌာနဟာ အထူးတိုင်းစစ်ဌာနကို ထပ်မံဖွဲ့စည်းလိုက်တယ်လို့ မနေ့က ဩဂုတ် ၂၇ ရက်မှာ ကြေညာပါတယ်။
NUG ရဲ့ ပြည်သူ့ကာကွယ်ရေး တပ်မတော်၊ အမှတ် (၁) စစ်ဆင်ရေးနယ်မြေရှိ တပ်ရင်းတွေ၊ ဗျူဟာများကို စနစ်တကျ စုဖွဲ့မှု ပြုလုပ်ပြီး အထူးတိုင်းစစ်ဌာနကို ဖွဲ့စည်းတာဝန်ပေးအပ်ခဲ့တာလို့ ဆိုပါတယ်။
အဆိုပါ အထူးတိုင်းစစ်ဌာနဟာ ပြည်သူ့ကာကွယ်ရေးတပ်မတော်၊ စစ်ရုံးချုပ်ရဲ့ တိုက်ရိုက်ကွပ်ကဲမှုအောက်မှာရှိပြီး အမှတ် (၁) စစ်ဆင်ရေးနယ်မြေရဲ့ စစ်ဆင်ရေးကွပ်ကဲမှုအောက်မှာရှိတဲ့ တိုင်းစစ်ဌာန ဖြစ်တယ်လို့ ဆိုပါတယ်။
အထူးတိုင်းစစ်ဌာနအနေဖြင့် တိုင်းစစ်ဌာနကွပ်ကဲမှုအောက်မှာရှိတဲ့ နည်းဗျူဟာတွေ၊ တပ်ရင်းတွေ နဲ့ တိုင်းစစ်ဌာနစစ်ဆင်ရေးကွပ်ကဲမှုအောက်မှာရှိတဲ့ ပြည်သူ့ကာကွယ်ရေး အဖွဲ့ (ပကဖ) တွေ၊ ဒရုန်းလက်ရုံးတပ်ဖွဲ့တွေကို ဦးစီးကွပ်ကဲလျက် မဟာမိတ် EROs တပ်ဖွဲ့တွေ၊ LPDF တွေနဲ့အတူ စစ်ဆင်ရေးတွေကို အရှိန်အဟုန်မြှင့် ဖော်ဆောင်သွားမယ်လို့ ဆိုပါတယ်။
ဒါကြောင့် အထူးတိုင်းစစ်ဌာန Facebook Page စတင်ဖွင့်လှစ်တဲ့အချိန်မှစ၍ တိုင်းစစ်ဌာနရဲ့ ထုတ်ပြန်ကြေညာချက်တွေ၊ စစ်ဆင်ရေးဆောင်ရွက်ချက်တွေနဲ့ တပ်ပိုင်းဆိုင်ရာ ကိစ္စရပ်တွေကို ပြည်သူလူထုသို့ အချိန်နဲ့တပြေးညီ တရားဝင်ထုတ်ပြန်သွားမယ်လို့ အသိပေးထားပါတယ်။
