သျှမ်းပြည်မြောက်ပိုင်း ကျောက်မဲမြို့ နဲ့ နောင်ချိုမြို့ကြားရှိ ကမ္ဘာကျော် ဂုတ်ထိပ်တံတားကြီး တိုက်ပွဲကြောင့် မိုင်းခွဲဖျက်ဆီးခံရတယ်လို့ ဒီနေ့ ဩဂုတ် ၂၄ ရက်နေ့မှာ လူမူကွန်ရက် စာမျက်နှာမှာ ပျံ့နှံ့လာခဲ့ပါတယ်။
ကမ္ဘာကျော် ဂုတ်ထိပ်တံတားကို ဘယ်အဖွဲ့အစည်းက မိုင်းခွဲဖျက်ဆီးသွားသလဲဆိုတာ အတည်မပြုနိုင်သေးဘဲ စစ်တပ်ကို ထောက်ခံအားပေးတဲ့ တယ်လီဂရမ်ချန်နယ်တွေမှာတော့ တအာင်းတပ် (TNLA) က ဖျက်ဆီးလိုက်တာလို့ ရေးသားကြပါတယ်။ အဆိုပါ ရေးသားပြောဆိုမှုတွေနဲ့ ပတ်သက်၍ TNLA ဖက်က တစ်စုံတရာ ထုတ်ပြန်ခြင်း မရှိသေးပေ။
အဆိုပါ ဂုတ်ထိပ်တံတား မိုင်းခွဲဖျက်ဆီးခံရတာကြောင့် ကျောက်မဲမြို့နယ် နောင်ပိန်ဘက်ခြမ်းရှိ တံတားရဲ့အလျား ပေ ၃၀ ခန့် ပျက်ဆီးခဲ့တယ်လို့ ဆိုပါတယ်။
လက်ရှ်ိမှာ နောင်ချိုမြို့ကို ပြန်လည်သိမ်းပိုက်ထိန်းချုပ်ထားတဲ့ စစ်တပ်ဟာ ကျောက်မဲမြို့ဘက်ကို ဆက်လက်ထိုးစစ်ဆင်တိုက်ခိုက်လျက်ရှိနေပြီး နောင်ပိန်ရွာအနီး တိုက်ပွဲတွေ ပြင်းထန်လျက်ရှိနေတယ်လို့ သိရပါတယ်။
အဆိုပါ ပျက်ဆီးသွား ဂုတ်ထိပ်တံတားဟာ မန္တလေး-လားရှိုး မီးရထားလမ်းပေါ် အရေးပါဆုံး တံတားတစ်စင်းဖြစ်ပြီး ၁၈၉၉ ခုနှစ်မှာ တည်ဆောက်ခဲ့ကာ ၁၉၀၀ ခုနှစ်မှာ ပြီးစီးခဲ့တဲ့ ကမ္ဘာ့အမြင့်ဆုံးတံတားစာရင်းဝင် ကမ္ဘာ့အမွေအနှစ်တစ်ခု ဖြစ်တယ်လို့ သိရပါတယ်။
