ကယား (ကရင်နီ) ပြည်နယ်ရှိ တော်လှန်ရေးပူးပေါင်းတပ်တွေ ထိန်းချုပ်ထားတဲ့ ဒီမော့ဆိုမြို့ကို စစ်တပ်က ဩဂုတ် ၁၉ ရက်နေ့မှာ ပြန်လည်သိမ်းပိုက်ထိန်းချုပ်လိုက်ပြီလို့ ထုတ်ပြန်ထားပါတယ်။

၂၀၂၃ ခုနှစ် နိုဝင်ဘာလကစ၍ ဒီမော့ဆိုမြို့နယ် နေရာအများစုကို ကရင်နီတော်လှန်ရေးပူးပေါင်းတပ်ဖွဲ့တွေက ထိန်းချုပ်ထားနိုင်ခဲ့ပေမယ့် စစ်တပ်ရဲ့ ခလရ ၁၀၂ နဲ့ ခမရ ၄၂၇ တပ်ရင်းတို့ကို မသိမ်းပိုက်နိုင်ခဲ့ဘဲ အဆိုပါတပ်ရင်းနှစ်ရင်းကို အခြေပြုကာ ပြန်လည်ထိုးစစ်ဆင်လာခဲ့တာ ဖြစ်တယ်လို့ သိရပါတယ်။

တော်လှန်ရေးအင်အားစုတွေ ထိန်းချုပ်ထားတဲ့ ဒီမော့ဆိုမြို့ကို ပြန်လည်ထိန်းချုပ်နိုင်ရေး ၂၀၂၅ ခုနှစ်၊ ဩဂုတ် ၄ ရက်နေ့မှာစ၍ ဒီမော့ဆိုမြောက်ဖက်ခြမ်း ရွှေယောက်ရပ်ကွက်အတွင်းရှိ တောင်ငူလမ်းဆုံ နဲ့ အရှေ့တောင်ဘက် ပါဒေါဒူရွာတို့မှစ၍ လက်နက်ကြီးပစ်ကူတွေနဲ့ စနစ်တကျ အဆင့်ဆင့်ခြေကုတ်ယူခဲ့ပြီး ၎င်းမှတဆင့် ခံစစ်လုပ်ထားတဲ့ မြို့တွင်းရှိ မြေပေါ်၊ မြေအောက် ဘန်ကာတွေ၊ အထပ်မြင့် အဆောက်အဦတွေ၊ စာသင်ကျောင်းတွေ၊ မြို့နယ်အုပ်ချုပ်ရေးမှူးရုံး၊ ချက်ကျောင်း နဲ့ ဆေးရုံနေရာတို့ကို တိုက်ခိုက်ခဲ့တယ်လို့ ဆိုပါတယ်။

ဩဂုတ်လ ၇ ရက်နေ့မှာ ဒီမော့ဆိုမြို့ရဲ့ အရှေ့တောင်ဘက်ရှိ ပါဒိုးဒူကျေးရွာ နဲ့ ရှုးဖယ်ခူရပ်ကွက်ကို လည်းကောင်း၊ ဩဂုတ်လ ၁၃ ရက်နေ့မှာ အောင်မင်္ဂလာရပ်ကွက်အတွင်းရှိ မြို့နယ်ရဲစခန်း၊ မီးသတ်ဦးစီးဌာန၊ မြို့နယ်ပြည်သူ့ဆေးရုံ နဲ့ မြို့နယ်အထွေထွေအုပ်ချုပ်ရေးမှူးရုံးတို့ကို လည်းကောင်း၊ ဩဂုတ် ၁၅ ရက်နေ့မှာ ရွှေယောက်ရပ်ကွက်တစ်ခုလုံးနဲ့ စည်ပင်သာယာရပ်ကွက်ရှိ မြို့နယ်ခန်းမ၊ မြို့မရပ်ကွက်အတွင်းရှိ ချက်ကျောင်းနေရာတွေကို လည်းကောင်း ပြည်လည်ထိန်းချုပ်နိုင်ခဲ့တယ်လို့ ဆိုပါတယ်။

စစ်ဆင်ရေးကာလ ၁၆ ရက်အတွင်း တော်လှန်ရေးတပ်တွေ နဲ့ တိုက်ပွဲကြီးတိုက်ပွဲငယ် ၂၃ ကြိမ် ဖြစ်ပွားပြီး တော်လှန်ရေးရဲဘော်တွေရဲ့ အလောင်း ၆ လောင်း နဲ့ လက်နက်မျိုးစုံ ၅ လက် သိမ်းဆည်းရမိသလို စစ်တပ်ဘက်ကလည်း ထိခိုက်သေဆုံးမှု၊ ဒဏ်ရာရရှိမှုတွေရှိခဲ့တယ်လို့ ဆိုပါတယ်။

ပြီးခဲ့တဲ့ ဇူလိုင်လဆန်းပိုင်းက စစ်တပ်ဟာ မိုးဗြဲမြို့တို့ကို ပြန်လည်သိမ်းပိုက်ခဲ့ပြီး လက်ရှိမှာတော့ ဒီးမော့ဆိုမြို့ကို ပြန်လည်သိမ်းပိုက်ထိန်းချုပ်နိုင်ခဲ့တာ ဖြစ်ပါတယ်။