မိုးညှင်းခရိုင်၊ အင်းတော်ကြီးဒေသမှာ ရှမ်းနီအမျိုးသားများ တပ်မတော် (SNA) ထိန်းချုပ်ထားတဲ့ မိုင်းနောင်၊ မမုန်ကိုင်ကျေးရွာတွေကို ကချင်လွတ်လပ်ရေးတပ်မတော် (KIA) ပူးပေါင်းအဖွဲ့က လာရောက်တိုက်ခိုက်တာကြောင့် နှစ်ဖက်တိုက်ပွဲ ဆက်ဖြစ်ပွားနေကြောင်း ဒေသခံတွေက ပြောပါတယ်။
မနေ့က ဩဂုတ် ၁၆ ရက် မနက်ပိုင်းမှ စတင်၍ KIA က အင်အားအလုံးအရင်းနဲ့ ထိုးစစ်ဆင် တိုက်ခိုက်လာခြင်းဖြစ်ပြီး ဒီနေ့အထိ နှစ်ဖက်တိုက်ပွဲ ပြင်းထန်နေတယ်လို့ ပြောပါတယ်။
ဒေသခံတစ်ဦးက “ပစ်နေကြတုန်းပဲ၊ မိုင်းနောင်ရွာအထိတော့ မရောက်ဘူး။ မိုင်းနောင်ရွာခံတွေတော့ ဘုန်းကြီးကျောင်းမှာ မထွက်ရသေးဘူး။ မိုင်းနောင် ဗိုလ်တဲကုန်းရပ်ကွက်အထွက် ဘုရားကုန်း သာယာတော သုသာန် တယ်လီနော တာဝါတိုင် မမုန်ကိုင်ကြား အဲမှာ အဓိက ဖြစ်နေကြတယ်၊ KIA ဖက်က အင်အားများတယ်လို့ ပြောတယ်။ သူတို့ရှိတဲ့ နေရာတွေပဲ လက်နက်ကြီး ကျနေတာတဲ့” လို့ ပြောပါတယ်။
လက်ရှိမှာ နှစ်ဖက်တိုက်ပွဲ ပြင်းထန်နေသလို လက်နက်ကြီး ပစ်ခတ်မှု၊ ဒရုန်းနဲ့ တိုက်ခိုက်မှုတွေလည်း ရှိနေပြီး မနေ့က မိုင်းနောင်ရွာအတွင်း လက်နက်ကြီး ကျရောက်ပေါက်ကွဲတာကြောင့် အရပ်သား ထိခိုက်မှုလည်း ရှိခဲ့တယ်လို့ ဒေသခံတစ်ဦးက ပြောပါတယ်။
ပြီးခဲ့တဲ့ ဇူလိုင် ၁၄ ရက်နေ့က အင်းတော်ကြီး ဒေသမှာ SNA နဲ့ KIA ပူးပေါင်းတပ်ဖွဲ့တို့အကြား တိုက်ပွဲဖြစ်ပွားခဲ့ပြီး မိုင်းနောင်၊ လုံးတုံ၊ မမုန်ကိုင်ကျေးရွာတွေကို SNA က သိမ်းပိုက်ထိန်းချုပ်နိုင်ခဲ့တယ်လို့ ဆိုပါတယ်။
အဆိုပါ တိုက်ပွဲတွေကြောင့် ဘေးကင်းရာ တိမ်းရှောင်သွားတဲ့ ဒေသခံတွေဟာလည်း ဇူလိုင်လကုန်ပိုင်းမှာ နေရပ်ကို အသီးသီး ပြန်ဝင်ရောက် နေထိုင်ကြပြီ ဖြစ်သလို စာသင်ကျောင်းတွေလည်း ပြန်လည်ဖွင့်လှစ်နိုင်ခဲ့ကြောင်း ပြောပါတယ်။
အဲဒီနောက် ဩဂုတ် ၁၆ ရက်မှာ KIA ပူးပေါင်းအဖွဲ့က အင်အားအလုံးအရင်းနဲ့ ပြန်လည်ထိုးစစ်ဆင် တိုက်ခိုက်လာတာကြောင့် နှစ်တိုက်ပွဲတွေ ပြန်ဖြစ်လာခဲ့ရတယ်လို့ ဒေသခံတွေက ပြောပါတယ်။
မိုးညှင်းခရိုင် အင်းတော်ကြီးဒေသမှာ ရှမ်းနီလူမျိုးတွေက အများစု နေထိုင်ကြပြီး ဗမာ၊ ကချင် လူမျိုးစု အနည်းငယ်လည်း နေထိုင်ကြတယ်လို့ သိရပါတယ်။
