ရှမ်းနီအမျိုးသားများ တပ်မတော် (SNA) ထိန်းချုပ်ထားတဲ့ မိုးညှင်းခရိုင်၊ အင်းတော်ကြီးဒေသ မိုင်းနောင်ကျေးရွာအနီးမှာ ကချင်လွတ်လပ်ရေးတပ်မတော် (KIA) ပူးပေါင်းတပ်ဖွဲ့တို့ လာရောက်တိုက်ခိုက်တာကြောင့် ဒီနေ့ မနက်ပိုင်းမှာ တိုက်ပွဲပြန်လည်ဖြစ်ပွားခဲ့တယ်လို့ ဒေသခံတွေက ပြောပါတယ်။
ဒေသခံတစ်ဦးက “ဒီနေ့ မနက်ပဲ မိုင်းနောင် သုသာန်ဖက်မှာ ပြန်ဖြစ်နေကြပြီ။ KIA ဖက်က လာတိုက်တာလို့ ကြားတယ််” လို့ ပြောပါတယ်။
အလားတူ SNA ထိန်းချုပ်ထားတဲ့ မမုန်ကိုင်ကျေးရွာကိုလည်း KIA နဲ့ ပူးပေါင်းတပ်ဖွဲ့တို့က လာရောက်တိုက်ခိုက်နေတယ်လို့ သိရပါတယ်။
တိုက်ပွဲဖြစ်ပွားမှုနဲ့ ပတ်သက်ပြီး အခြေအနေ အသေးစိတ်ကို မသိရှိရသေးဘဲ အရပ်သားအချို့ ထိခိုက်မှု ရှိနေကြောင်း၊ ဒေသခံတွေအနေနဲ့လည်း တိမ်းရှောင်ခြင်း မရှိသေးကြောင်း သိရပါတယ်။
ပြီးခဲ့တဲ့ ၂၀၂၅ ခုနှစ်၊ ဇူလိုင် ၁၄ ရက်နေ့က အင်းတော်ကြီး ဒေသမှာ SNA နဲ့ KIA ပူးပေါင်းတပ်ဖွဲ့တို့အကြား တိုက်ပွဲဖြစ်ပွားခဲ့ပြီး မိုင်းနောင်၊ လုံးတုံ၊ မမုန်ကိုင်ကျေးရွာတွေကို SNA က သိမ်းပိုက်ထိန်းချုပ်နိုင်ခဲ့တယ်လို့ ဆိုပါတယ်။
အဲဒီနောက် KIA နဲ့ ပူးပေါင်းအဖွဲ့တွေက လူသူလက်နက်အင်အားတွေ စုဆောင်းပြီး လာရောက်တိုက်ခိုက်ခြင်း ဖြစ်ကြောင်း ဒေသခံတွေက ပြောပါတယ်။
