စစ်ကိုင်းတိုင်းဒေသကြီး၊ တမူးမြို့နယ် နန်မွန်းတားရွာမှာ စစ်တပ်နဲ့ တော်လှန်ရေးအင်အားစုပူးပေါင်းတပ်တို့ တိုက်ပွဲအတွင်း နှစ်ဖက်ကျဆုံးမှုတွေ ရှိခဲ့တယ်လို့ အမှတ် (၁) စစ်ဒေသက ထုတ်ပြန်ပါတယ်။
အဆိုပါ တိုက်ပွဲအတွင်း စစ်တပ်ဖက်က ၆ ဦးသေဆုံးပြီး လက်နက် ၉ လက်၊ ခဲယမ်းအချို့ သိမ်းဆည်းရမိခဲ့ကြောင်း၊ တော်လှန်ရေးအင်အားစုဖက်က ၅ ဦး သေဆုံးကာ လက်နက် ၃ လက် ဆုံးရှုံးခဲ့တယ်လို့ ဆိုပါတယ်။
ဩဂုတ် ၅ ရက်နေ့မှာ တော်လှန်ရေးအင်အားစုတွေ စိုးမိုးထားတဲ့ နန်မွန်းတားရွာကို ရန်ငြိမ်းအောင်ရွာမှ ခလရ-၂၂၈ မှ အင်အား ၈၀ ခန့်က စတင်ထိုးစစ်ဆင် တိုက်ခိုက်ခဲ့ကြောင်း အဲဒီနောက် ဩဂုတ် ၈ ရက်မှာ ပြန်ဆုတ်သွားတယ်လို့ ဆိုပါတယ်။
တိုက်ပွဲအတွင်း နန်မွန်းတားရွာ ဘုရားကျောင်းသို့ တံတားဦးမှ တက်လာတဲ့ Yak-130 (၁) စီးနဲ့ ပေါင် (၂၅၀) ဗုံး (၂) လုံးကြဲချ တိုက်ခိုက်ပြီး တံတားဦးလေတပ်မှ တက်လာသော MIG-29 (၁) စီးနဲ့ Cluster ဗုံးကြဲချ တိုက်ခိုက်ခဲ့ကြောင်း၊ ဒါ့အပြင် ရန်သူ့ဘက်မှ OWA အသေခံဒရုန်း အမျိုးအစားတွေကိုလည်း အသုံးပြုခဲ့တယ်လို့ ဆိုပါတယ်။
တော်လှန်ရေးအင်အားစုဖက်မှာတော့ တမူးခရိုင် စစ်ကြောင်း၊ မော်လိုက်ခရိုင် စစ်ကြောင်း၊ ကလေးခရိုင် စစ်ကြောင်း၊ KNA(B)၊ NLA နဲ့ CNA တပ်ဖွဲ့တို့မှ ပူးပေါင်းတိုက်ခိုက်ခဲ့တာလို့ ဆိုပါတယ်။
