လူပေါင်း တစ်သိန်းကျော် သေဆုံးသွားခဲ့တဲ့ အမေရိကန်ရဲ့ အဏုမြူဗုံးကျဲမှုဟာ ဒီကနေ့မှာတော့ နှစ်(၈၀ ) ပြည့်လို့သွားခဲ့ပါပြီ။ ၁၉၄၅ ခုနှစ် ဩဂုတ်လ ၆ ရက်က ဂျပန်နိုင်ငံ ဟီရိုရှီးမားမြို့ကို အမေရိကန်က ကမ္ဘာ့ပထမဆုံး အဏုမြူဗုံးကြဲခဲ့တာပါ။

အဲ့ဒီနောက် သုံးရက်အကြာမှာပဲ နာဂါဆာကီမြို့ကို ဒုတိယတစ်လုံး ထပ်မံကျဲချခဲ့ပြီးနောက် ဒုတိယကမ္ဘာစစ်ကြီးလဲ အဆုံးသတ်သွားခဲ့ပါတယ်။ ဗုံးဒဏ်ကြောင့် မြို့နှစ်မြို့ပေါင်း လူပေါင်း ၁၁၈၀၀၀ ကျော်သေဆုံးသွားခဲ့လိမ့်မယ်လို့ ခန့်မှန်းကြပါတယ်။

၂၀၂၅ခုနှစ် ဩဂုတ် ၆ ရက် ဒီကနေ့ဟာ ဟီရိုရှီးမားကိုအဏုမြူဗုံးကြဲချခဲ့တဲ့နှစ် (၈၀) ပြည့်အထိမ်းအမှတ်နေ့ဖြစ်ပြီး အဆိုပါအခမ်းအနားကို နိုင်ငံပေါင်း ၁၂၀ မှ ကိုယ်စားလှယ်တွေ တက်ရောက်ကြတယ်လို့ နိုင်ငံပိုင်သတင်းတွေမှာ ဖော်ပြထားကြပါတယ်။

နှစ်ပတ်လည်အခမ်းအနားကိုတော့ ဟီရိုရှီးမားမြို့ ငြိမ်းချမ်းရေးအထိမ်းအမှတ်ပန်းခြံမှာ ကျင်းပပြုလုပ်ခဲ့တာဖြစ်ပြီး ဂျပန်ဝန်ကြီးချုပ် ရှီဂီရူ အီရှီဘာ အပါအဝင် နျူကလီးယား အင်အားကြီးနိုင်ငံတွေဖြစ်ကြတဲ့ အမေရိကန်နဲ့ ဗြိတိန်နိုင်ငံတွေလည်း ပါဝင်တက်ရောက်ခဲ့တယ်လို့သိရပါတယ်။

နှစ်စဉ်နှစ်တိုင်း အဏုမြူဗုံးဒဏ်ခံခဲ့ရသူတွေရဲ့ အသစ်ပြုစုစာရင်းကို ပန်းခြံရဲ့ အထိမ်းအမှတ်ကျောက်တိုင်မှာ ပြသထားပါတယ်။ အဲ့ဒီစာရင်းထဲမှာ ဗုံးပေါက်ကွဲမှုကနေလွတ်မြောက်ခဲ့ပေမယ့်လည်း ပြီးခဲ့တဲ့နှစ်အတွင်းသေဆုံးသွားသူတွေရဲ့ စာရင်းတွေလဲပါဝင်ပါတယ်။ ဖော်ပြပါစာရင်းတွေအရ ဗုံးဒဏ်ကြောင့်သေဆုံးသူ လူပေါင်း ၃၄၉,၂၄၆ ဦးရှိကြောင်း သိရပါတယ်။

ဂျပန်ဟာ စစ်ပွဲမှာ အဏုမြူဗုံးကြဲတာကိုခံခဲ့ရတဲ့ တစ်ခုတည်းသော နိုင်ငံဖြစ်တယ်လို့ မြို့ရဲ့အထိမ်းအမှတ်ပန်းခြံမှာ ကျင်းပတဲ့အခမ်းအနားမှာ မြို့တော်ဝန်ကာဇူမီ မတ်ဆူအီက မိန့်ခွန်းပြောကြားခဲ့ပါတယ်။ ဂျပန်ဟာ စစ်မှန်တဲ့၊ အဓွန့်ရှည်တဲ့ ငြိမ်းချမ်းရေးကို လိုလားတဲ့ ပြည်သူ အားလုံးကို ကိုယ်စားပြုလိုပါတယ်လို့လည်း သူက ဆိုပါတယ်။

အဏုမြူဗုံး ကျဲချချိန်က လူပေါင်းသောင်းဂဏန်းလောက်ဟာ ချက်ချင်းအငွေ့ပျံ ပျောက်ကွယ်ပြီး သေဆုံးခဲ့ပါတယ်။ နောက်ထပ် အများအပြားကလည်း ဓာတ်ရောင်ခြည်သင့်မှုနဲ့ နောက်ဆက်တွဲ ဆိုးကျိုးတွေကြောင့် အသက်ဆုံးရှုံးခဲ့ရပါတယ်။

ဗုံးဒဏ်မှ လွတ်မြောက်လာသူများအဖွဲ့ Nihon Hidankyo ဟာ ပြီးခဲ့တဲ့နှစ်က ငြိမ်းချမ်းရေးနိုဘယ်လ်ဆုကို ရရှိခဲ့ပြီး သူတို့အဖွဲ့ကတော့ ကမ္ဘာမှာနျူကလီးယားလက်နက်တွေကို ကွယ်ပျောက်သွားစေချင်တဲ့ ဆန္ဒတွေ ရှိနေကြပါတယ်။

ဂျပန်အစိုးရအနေနဲ့ကတော့ နျူကလီးယား စစ်လက်နက်တွေကို ပိတ်ပင်ဖို့ နိုင်ငံပေါင်း ၇၀ ကျော်လောက်က သဘောတူ လက်မှတ်ရေးထိုးထားတဲ့ (TPNW) စာချုပ်မှာ ပါဝင် လက်မှတ်ရေးထိုးဖို့လည်း တောင်းဆိုခဲ့ပါတယ်။ ၂၀၂၁ ခုနှစ်မှာ စတင် အသက်ဝင်ခဲ့တဲ့ အဲ့ဒီစာချုပ်ကို အမေရိကန်၊ ရုရှားတို့လို နျူကလီးယား လက်နက်ပိုင်ဆိုင်ထားတဲ့ နိုင်ငံကြီးတွေကတော့ ဆန့်ကျင်ထားကြပါတယ်။

သမိုင်းတလျှောက် အဏုမြူဗုံးကြဲတာခံခဲ့ရတဲ့ တစ်ခုတည်းသော နိုင်ငံဖြစ်တဲ့ ဂျပန်ကလည်း အဲဒီစာချုပ်မှာ ပါဝင် လက်မှတ်ရေးထိုးဖို့ ကိစ္စကို ငြင်းဆိုခဲ့ပါတယ်။ အကြောင်းကတော့ နိုင်ငံရဲ့လုံခြုံရေးအတွက် မဟာမိတ် အမေရိကန်ဆီက နျူကလီးယားစစ်လက်နက်တွေကို လိုအပ်တယ်လို့ ဂျပန်အစိုးရက ယူဆထားကြောင်း ဆိုရမှာပဲဖြစ်ပါတယ်။