စစ်ကိုင်းတိုင်းဒေသကြီး၊ ဒီပဲယင်းမြို့နယ်အတွင်းက အိုးထိမ်းကွင်းကျေးရွာ စာသင်ကျောင်းကို ဒီနေ့ မနက်ပိုင်းမှာ စစ်ကောင်စီက လေကြောင်းနဲ့ ဗုံးကြဲတိုက်ခိုက်ခဲ့တာကြောင့် ကျောင်းသားအပါအဝင် အများပြား ထိခိုက်သေဆုံးတာတွေ ရှိနေတယ်လို့ သိရပါတယ်။
ဒီနေ့မနက် ၁၀ နာရီဝန်းကျင်မှာ ပေါင်း ၅၀၀ ဗုံး ၂ လုံးထက်မနည်း ကြဲချတိုက်ခိုက်ခဲ့တာ ဖြစ်ပြီး ကလေးငယ် ၁၀ ကျော် နဲ့ ကျောင်းဆရာမ ၂ ဦးရဲ့ အလောင်းကိုသာ ရရှိထားပြီး နောက်ထပ် ပျောက်ဆုံးနေသူ အများအပြား ရှိနေဆဲ ဖြစ်တယ်လို့ သိရပါတယ်။
အဆိုပါ အိုးထိန်းတွင်းကျေးရွာရှိ စာသင်ကျောင်းက အမျိုးသားညီညွတ်ရေးအစိုးရ (NUG)ရဲ့ ကြားကာလပညာရေးကျောင်းဖြစ်တယ်လို့လည်း သိရပါတယ်။
အဆိုပါ စာသင်ကျောင်းကို စစ်ကောင်စီက အကြောင်းမဲ့ လေကြောင်းတိုက်ခိုက်ခဲ့တာဖြစ်ပြီး ထိခိုက်ဒဏ်ရာရရှိမှု အသေးစိတ်အခြေအနေတွေကို ဆက်လက်စုံစမ်းနေတယ်လို့ ဒီပဲယင်းမြို့နယ် ပြည်သူ့အုပ်ချုပ်ရေးအဖွဲ့ကလည်း အသိပေးထုတ်ပြန်ထားပါတယ်။
စစ်ကောင်စီက မေလ ၆ ရက်နေ့မှ မေလ ၃၁ ရက်နေ့အထိ အပစ်အခတ်ရပ်စဲရေး ကြေညာထားပေမယ့်လည်း နိုင်ငံတစ်ဝန်းမှာ လေယာဉ်နဲ့ ဗုံးကျဲတိုက်ခိုက်တာ၊ လက်နက်ကြီးတွေနဲ့ ပစ်ခတ်တာ၊ အဆိပ်ငွေ့ဗုံးတွေ ကြဲပြီး ထိုးစစ်ဆင်တာတွေကို လုပ်ဆောင်လျက်ရှိတယ်လို့ တော်လှန်ရေး အင်အားစုတွေက ပြောပါတယ်။
