အာရက္ခတပ်တော် (AA) ရဲ့ အာရက္ခပြည်သူ့ကျန်းမာရေးဌာနက ဖွင့်လှစ်မယ့် ၁၈ လတာ သားဖွားသင်တန်း လျှောက်လွှာတွေ ခေါ်နေကြောင်း သိရပါတယ်။
အဆိုပါ သင်တန်းဟာ ရခိုင်ပြည်သူတွေရဲ့ ကျန်းမာရေးဆိုင်ရာ ကိစ္စတွေကို ဖြေရှင်းနိုင်ဖို့အတွက် ခေါ်ယူတာ ဖြစ်ပြီး ပညာအရည်အချင်း အနေ နဲ့ ၁၂ တန်း ဒါမှမဟုတ် တက္ကသိုလ်ဝင်တန်းအောင်မြင်ပြီးဖြစ်တဲ့ အမျိုးသမီးတွေ မည်သူမဆို လျှောက်ထားနိုင်တယ်လို့ ဆိုပါတယ်။
သင်တန်း ၁၈ လတာ တက်ရောက်ပြီးတဲ့နောက် AA ရဲ့ အာရက္ခပြည်သူ့ကျန်းမာရေးဌာနလက်အောက်မှာ ရှိတဲ့ ကျေးလက်ကျန်းမာရေးဌာတွေထဲက ဌာနခွဲတွေက လစ်လပ်နေတဲ့ သားဖွားဆရာမ (MidWife) နေရာတွေမှာ ခန့်အပ်သွားမှာ ဖြစ်ပြီး အနည်းဆုံး ၅ နှစ် တာဝန်ထမ်းဆောင်ရမယ်လို့ ဆိုပါတယ်။
အာရက္ခပြည်သူ့ကျန်းမာရေးဌာနက သင်ကြားမယ့် သားဖွားအတတ်ပညာသင်တန်းမှာ ကိုယ်ဝန်ဆောင်စောင့်ရှောက်ခြင်း၊ မီးဖွားပေးခြင်းနဲ့ မီးတွင်းကာလတွင် စောင့်ရှောက်ခြင်း၊ မွေးကင်းစ နဲ့ ၅ နှစ်အောက်ကလေး ကျန်းမာဖွံ့ဖြိုးရေးလုပ်ငန်းတွေ မျိုးဆက်ပွားကျန်းမာရေး၊ အာဟာရဖွံ့ဖြိုးရေး၊ ကာကွယ်ဆေးထိုးလုပ်ငန်း၊ ဆေးကုသရေး စတာတွေ ပါဝင်တယ်လို့လည်း ဆိုပါတယ်။
လျှောက်ထားလိုသူတွေ အနေ နဲ့ကတော့ ဓာတ်ပုံ ၊ နိုင်ငံသားမှတ်ပုံတင် မိတ္တူ၊ အုပ်ချုပ်ရေးမှူး ရဲ့ ထောက်ခံချက် စတဲ့ စာရွက်စာတန်းတွေနဲ့ အတူ မြို့နယ် ပြည်သူ့ ကျန်းမာရေး ဦးစီးဌာနကို ပညာအရည်အချင်း နဲ့ ပြည်မှီတဲ့သူ ဘယ်သူမဆို စက်တင်ဘာလ ၉ ရက်နေ့ကို နောက်ဆုံးထား လျှောက်ထားနိုင်တယ်လို့လည်း ဆိုပါတယ်။
