ရှမ်းနီအမျိုးသားများတပ်မတော် (SNUC/SNA) ဦးဆောင်မှုဖြင့် စစ်ကိုင်းတိုင်းဒေသကြီး အထက်ပိုင်း ဗန်းမောက်မြို့မှာ မိခင်နဲ့ ကလေး ကျန်းမာရေးအတွက် ၁၀ နှစ်အောက် ကလေးငယ်တွေကို ကာကွယ်ဆေးထိုးနှံပေးသွားမယ်လို့ သိရပါတယ်။
SNA ထိန်းချုပ်ထားတဲ့ ဗန်းမောက်မြို့နယ် ဗန်းမောက်ဆေးရုံကြီးမှာ မနက်ဖြန် ဩဂုတ်လ ၁ ရက်နေ့ ထိုးနှံပေးနိုင်ဖို့ ကြိုတင်ပြင်ဆင်မှုတွေ ပြုလုပ်နေတယ်လို့ SNA မှ တာဝန်ရှိသူထံက သိရပါတယ်။
SNA မှ တာဝန်ရှိသူတစ်ဦးက “လူဦးရေကတော့ အတိအကျတော့ မပြောနိုင်သေးဘူး။ လျာထားချက်ကတော့ များတယ်။ မနက်ဖြန် မနက် ၈ နာရီစပြီး ညနေ ၃ နာရီအထိ ထိုးပေးမှာပါ” လို့ ပြောပါတယ်။
ထို့အတူ ဗန်းမောက် အနောက်ခြမ်းရှိ ကျေးရွာတွေမှာလည်း အလှမ်းသင့်သလို ကျေးရွာအုပ်စုအလိုက် ကာကွယ်ဆေးထိုးနှံဖို့ လုပ်ဆောင်သွားမယ်လို့ သိရပါတယ်။
SNA ဦးဆောင်မှုနဲ့အတူ ပြီးခဲ့တဲ့ ဇူလိုင် ၁ ရက်နေ့မှ ဇူလိုင် ၃ ရက်နေ့အထိ ဗန်းမောက်မြို့ပေါ်က ပြည်သူလူထုတွေကို ငှက်ဖျားနဲ့ တုတ်ကွေး ကာကွယ်ဆေးထိုးနှံပေးခဲ့တယ်လို့ သိရပါတယ်။
အလားတူ ဟုမ္မလင်းမြို့နယ် ဟုမ္မလင်းမြို့ကုတင် ၁၀၀ ဆံ့ ပြည်သူဆေးရုံမှာ ပါရဂူဆရာဝန်ကြီးတွေမှ မျက်စိဝေဒနာရှင်တွေအတွက် ဇူလိုင် ၂၆ ရက်မှ ဇူလိုင် ၃၁ ရက်နေ့အထိ အခမဲ့ ကုသပေးနေပြီး SNA မှ ငွေအား၊ လုပ်အားကူညီပေးမှုတွေလည်း လုပ်ဆောင်ခဲ့တယ်လို့ သိရပါတယ်။
ဗန်းမောက်မြို့နယ်မှာ SNA ထိန်းချုပ်ထားတဲ့ နယ်မြေတွေမှာ ပြည်သူလူထုအတွက် ကျန်းမာရေး၊ ပညာရေး၊ လမ်းပန်းဆက်သွယ်ရေးတွေမှာ ကူညီထောက်ပံ့မှုတွေ လုပ်ဆောင်လျက်ရှိနေတယ်လို ဒေသခံတွေက ပြောပါတယ်။
တဖက်မှာလည်း SNA ကို ကချင်လွတ်မြောက်ရေးတပ်မတော် (KIA) နဲ့ ပူးပေါင်းတပ်ဖွဲ့တွေက မကြာခဏ ဆိုသလို ထိုးစစ်ဆင် တိုက်ခိုက်လျက်ရှိနေပြီး ဗန်းမောက်မြို့သိမ်းတိုက်ပွဲဖော်ဆောင်ရေး လူအင်အားတွေ စုဆောင်းလျက်ရှိနေတယ်လို့ သိရပါတယ်။
