အိုမန်နိုင်ငံ၊ ဆိုဟာရ် ဝီလာယတ်မြို့မှာ မနေ့ (ဇူလိုင် ၆ ရက်) က မြန်မာအိမ်အကူ အမျိုးသမီးတစ်ဦးဟာ လူသတ်မှုကျူးလွန်ခဲ့တယ်လို့ အိုမန်ရောက် မြန်မာနိုင်ငံသားတွေဆီက သိရပါတယ်။
အိမ်အကူလုပ်ငန်းလုပ်ကိုင်ဖို့ ယခုလ ဇူလိုင် ၁ ရက်မှာ အိုမန်ကို ရောက်ရှိနေတဲ့ မြန်မာအမျိုးသမီးတစ်ဦးက အိုမန်မှာ ရုံးထိုင်ပြီး အလုပ်သမားနဲ့ အလုပ်ရှင်ကြား ညှိနှိုင်းပေးတဲ့ ကြားခံအကျိုးဆောင် မြန်မာအမျိုးသမီးကို ဓားနဲ့ထိုး သတ်ဖြတ်ခဲ့တာ ဖြစ်ပါတယ်။
“အသတ်ခံရတဲ့ ရုံးထိုင်က ကောင်းလား၊ ဆိုးလားဆိုတာ မသိပေမယ့် တော်တော်များများက ဘာလို့ အပြစ်ပြောကြလဲဆို တစ်ချို့အေးဂျင့် တွေ ဘယ်လောက်ယုတ်မာထားလဲဆိုတာ အသိသာကြီးမို့လေ။ တကယ်လို့ သေသွားတဲ့ အမက မတရားအသတ်ခံရတယ်ဆိုရင်တောင် အဲဒီမကောင်းတဲ့ အေးဂျင့်တစ်ချို့ကြောင့်ပဲ အိမ်အကူတွေ ခဏခဏ သေတယ် ဘာသံမှ ထွက်မလာကြဘူး ဘာကြောင့်လဲ ဆိုတာ ဘယ်သူမှ စိတ်မဝင်စားကြဘူး” လို့ အိုမန်ရောက် မြန်မာအမျိုးသမီးတစ်ဦးက ပြောပါတယ်။
သေဆုံးသူအမျိုးသမီးဟာ အသက် ၂၃ နှစ်အရွယ် မယုနန္ဒာဆိုသူဖြစ်ပြီး ဧရာဝတီတိုင်း၊ မြန်အောင်မြို့ဇာတိဖြစ်ကြောင်း၊ သေဆုံးသူဟာ အိုမန်နိုင်ငံရဲ့မြို့တော် ဆိုဟာရ် ဝီလာယတ်မြို့မှာ မြန်မာအလုပ်သမားအကျိုးဆောင် ဝန်ဆောင်မှုလုပ်ငန်း ဆောင်ရွက်နေသူဖြစ်တယ်လို့ သိရပါတယ်။
ပြစ်မှုကျူးလွန်သူလို့ ယူဆခံထားရသူဟာ အသက် ၄၃ အရွယ်၊ မလွင်မာမြင့်ဆိုသူဖြစ်ပြီး ရန်ကုန်မြို့၊ သန်လျင်ဇာတိဖြစ်ကာ အိုမန်ကို ယခုလ ဇူလိုင် ၁ ရက်ကမှ ရောက်ရှိလာတာဖြစ်တယ်လို့ သိရပါတယ်။
အဆိုပါဖြစ်စဉ်နဲ့ ပတ်သက်ပြီး ဒူဘိုင်း၊ အိုမန်၊ စင်ကာပူ စတဲ့ နိုင်ငံတွေကို အိမ်ကူအလုပ်သမားစေလွှတ်ပေးနေတဲ့ အေဂျင်စီမှ တာဝန်ရှိသူတစ်ဦးက ယခုလိုပြောပြပါတယ်။
“သူကရောက်တာ ၅ ရက်ပဲရှိသေးတယ်။ သူဌေးက အဓမ္မ ပြုကျင့်တယ်ပြောလို့ အကျိုးဆောင်လုပ်ပေးနေတဲ့ ရုံးထိုင်ကောင်မလေးက သူ့ရုံးကို ခေါ်ထားပေးတာ။ အိမ်ဖော်လာလုပ်တဲ့အမျိုးသမီးက လျော်ကြေးပေးပြီး သူ့ကို ပြန်ပို့ဖို့ ကောင်မလေးကို ပြောတယ်။ အဲ့တာကို ကောင်မလေးက မသေချာပဲ လျော်ကြေးပေးလို့ မရကြောင်းနဲ့ CCTV လည်း စစ်ပေးမယ်၊ မနက်ကျ တိုင်ပေးမယ်ဆိုပြီး သူ့ဆီမှာပဲ အိပ်ခိုင်းလိုက်တာ။ နောက်နေ့သူဌေးတွေရောက်တော့ ရှင်းကြမယ်ဆိုပြီး သွားခေါ်တာ ရုံးထိုင်ကောင်မလေးမှာ ဓားတန်းလန်းနဲ့ သေနေတာကို တွေ့ခဲ့ရတယ်” လို့ သူ့ရဲ့ လူမှုကွန်ရက် မှာ ပို့စ်တင်ရေးသားထားပါတယ်။
အိုမန်ရောက် မြန်မာအလုပ်သမားတစ်ချို့ရဲ့ ပြောပြချက်အရ တရားခံဟု ယူဆရသူဟာ အလုပ်ရှင်နဲ့ ပတ်သက်ပြီး မကျေနပ်ချက်တစ်ချို့ရှိကြောင်း၊ အဆင်မပြေကြောင်းကို ရုံးထိုင်အကျိုးဆောင်ကို ဆက်သွယ်အကြောင်းကြားရာကနေ ရုံးမှာ ဖြေရှင်းခဲ့ပေမယ့် ညှိနှိုင်းမှုမှာ အဆင်မပြေဖြစ်ခဲ့ရပြီး လူသတ်မှုအထိဖြစ်ခဲ့တာ ဖြစ်တယ်လို့ ဆိုပါတယ်။
အဆိုပါလူသတ်မှုကိုတော့ အိုမန်ရဲတပ်ဖွဲ့က တိုက်ရိုက်ကိုင်တွယ်နေကာ သံသယရှိသူ အမျိုးသမီးအား ဖမ်းမိထားကြောင်း ထုတ်ပြန်ထားကာ ကျန်အသေးစိတ်အချက်အလက်တွေကိုတော့ ထုတ်ပြန်ထားခြင်းမရှိကြောင်း သိရပါတယ်။
