မိုးညှင်းမြို့နယ်၊ အင်းတော်ကြီး ဒေသမှာ ရှမ်းနီအမျိုးသားများ တပ်မတော် (SNA) နဲ့ ကချင်လွတ်လပ်ရေးတပ်မတော် (KIA) ပူးပေါင်းတပ်ဖွဲ့တို့အကြား တိုက်ပွဲဖြစ်ပွားခဲ့ပြီးနောက် တိမ်းရှောင်သွားတဲ့ ဒေသခံတွေ နေရပ်ပြန်ဝင်နေကြပြီဖြစ်တယ်လို့ သိရပါတယ်။
ပြီးခဲ့တဲ့ ဇူလိုင် ၁၄ ရက်နေ့က SNA ကျားဖြူစစ်ကြောင်းမှာ KIA ထိန်းချုပ်ထားတဲ့ မိုင်းနောင်၊ မမုန်ကိုင်ကျေးရွာတွေကို ထိုးစစ်ဆင်တိုက်ခိုက်ပြီး ထိန်းချုပ်လိုက်ပါတယ်။
လက်ရှိမှာ တိုက်ပွဲရှောင်တွေ နေရပ်ပြန်ဝင်ကြပြီ ဖြစ်သလို စာသင်ကျောင်းတွေလည်း ပြန်ဖွင့်ပြီဖြစ်ကြောင်း၊ SNA ထိန်းချုပ်ထားတဲ့ လုံးတုံကျေးရွာအထိ သွားလာ၍ ရကြောင်း ဒေသခံတစ်ဦးက ပြောပါတယ်။
“အားလုံးအဆင်ပြေနေပြီ။ ပြန်ဝင်ကုန်ပြီ။ SNA က မမောင်းထုတ်ပါဘူး။ ထွက်တောင် မထွက်ခိုင်းဘူး။ အခု ပြန်ဝင်နေကြပါပြီ။ ကျောင်းတောင်ပြန်ဖွင့်နေပြီကို အရှေ့ကမ်းတွေတော့ ပုံမှန်ပါပဲ။ အဓိကတော့ ကချင်တွေမနေရဲလို့ ပြေးကြတာပါ။ အဲ့တာကို သိတဲ့အတိုင်း ပုံကြီးချဲ့ပါ့ သူတို့မီဒီယာတွေက အခု လုံးတုံထိ အေးဆေးပါပဲ” လို့ ပြောပါတယ်။
အလားတူ အင်းတော်ကြီးဒေသ နမ့်မွန်းကျေးရွာမှ စတင်ပြီး ရွှေလက်ပန်၊ မိုင်းနောင်၊ မမုန်ကိုင် နဲ့ လုံးတုံကျေးရွာအထိ SNA မှ နေရာယူထိန်းချုပ်ထားတယ်လို့ သိရပါတယ်။
ဒေသခံပြည်သူတွေအနေဖြင့် SNA ကို စောင့်ကြည့်နေကြကြောင်း၊ ၎င်းတို့ ပြည်သူလူထုအကျိုးပြု လုပ်ငန်းတွေ ကောင်ကောင်းလုပ်နိုင်ပါက လူထုက စိတ်ဝင်စား လက်ခံလာမှာဖြစ်တယ်လို့ ဒေသခံတစ်ဦးက ပြောပါတယ်။
အင်းတော်ကြီးဒေသမှာ KIA ပူးပေါင်းတပ်တို့ သိမ်းပိုက်ထိန်းချုပ်ပြီးနောက်ပိုင်း ဒေသခံတွေနဲ့ လုပ်ငန်းရှင်တွေထံ အခွန်အခ ကောက်ခံမှု မြင့်မားနေတာကြောင့် ဒေသခံတွေ အခက်အခဲတွေနဲ့ ကြုံတွေ့ခဲ့ရတယ်လို့ ဆိုပါတယ်။
