သျှမ်းပြည်မြောက်ပိုင်း ကျောက်မဲမြို့နဲ ၅ မိုင်ခန့်သာဝေးတဲ့ စခန်းသာကျေးရွာကို စစ်တပ်က ပြန်လည်ထိန်းချုပ်လိုက်တယ်လို့ မနေ့က စက်တင်ဘာ ၂၆ ရက်မှာ စစ်တပ်ထောက်ခံတဲ့ တယ်ရီဂရမ်ချန်နယ်တွေက ရေးသားထားပါတယ်။
နှစ်ဖက်တပ်ဖွဲ့ တိုက်ပွဲဖြစ်ပွားပြီး နေ့လယ်ပိုင်းမှာ စခန်းသာကျေးရွာကို စစ်တပ်က ပြန်လည်ထိန်းချုပ်နိုင်ခဲ့ပြီး TNLA တပ်ဖွဲ့ဝင် အလောင်း ၄ လောင်းနဲ့ လက်နက်ခဲယမ်းများ သိမ်းဆည်းရမိ ခဲ့တယ်လို့ စစ်တပ်ထောက်ခံ တယ်ရီဂရမ်ချန်နယ်က ဓါတ်ပုံနဲ့တကွ ဖော်ပြထားပါတယ်။
TNLA စခန်းချထားတဲ့ စခန်းသာကျေးရွာကို စစ်တပ်က လေကြောင်း တိုက်ခိုက်မှုတွေအပြင် မြေပြင်ထိုးစစ်တွေ လုပ်ဆောင်ခဲ့ပြီး ပြန်လည်သိမ်းပိုက်လိုက်တာလို့ သိရပါတယ်။
နောင်ချိုမြို့နယ်ဘက်ကနေ ကျောက်မဲမြို့နယ်ထဲကို ထိုးစစ်ဆင်လာတဲ့ စစ်တပ် စစ်ကြောင်းဟာ ကျောက်မဲမြို့အနီးကို ရောက်ရှိလာပြီဖြစ်တာကြောင့် ဒေသခံအများစုလည်း ဘေးကင်းရာသို့ တိမ်းရှောင်မှုတွေလည်း ရှိနေတယ်လို့ သိရပါတယ်။
