ထိုင်းနိုင်ငံ နဲ့ ကမ္ဘောဒီးယားနိုင်ငံတို့အကြား လက်ရှိဖြစ်ပွားနေတဲ့ စစ်ရေး အခြေအနေတင်းမာမှုတွေကို သက်ဆိုင်ရာနိုင်ငံတွေအနေဖြင့် အမြန်ဆုံးငြိမ်းချမ်းစွာဖြေရှင်းနိုင်ဖို့ အာဆီယံအဖွဲ့ဝင်နိုင်ငံတစ်နိုင်ငံအနေနဲ့ အမျိုးသားညီညွတ်ရေးအစိုးရ (NUG) က တိုက်တွန်းထားပါတယ်။
ထိုင်း နဲ့ ကမ္ဘောဒီးယား နှစ်နိုင်ငံရဲ့ ပစ်ခတ်တိုက်ခိုက်မှုတွေအတွင်း နှစ်နိုင်ငံရှိ အရပ်သား ပြည်သူတွေ ထိခိုက်မှုတွေရှိလာသောကြောင့် နှစ်နိုင်ငံ အရပ်သားပြည်သူတွေရဲ့ လုံခြုံရေးအတွက် အထူး စိုးရိမ်မိတယ်လို့လည်း ဆိုပါတယ်။
ထိုင်းနိုင်ငံနဲ့ ကမ္ဘောဒီးယားနိုင်ငံတို့ရှိ လက်ရှိ စစ်ရေးအခြေအနေတင်းမာနေတဲ့ ဒေသတွေမှာ ရောက်ရှိနေသူ၊ ခရီးသွားလာနေသူ၊ အလုပ်လုပ်ကိုင်နေသူ မြန်မာနိုင်ငံသားတွေအနေဖြင့် မိမိတို့ ရောက်ရှိနေတဲ့နိုင်ငံရှိ သက်ဆိုင်ရာ နိုင်ငံ့လုံခြုံရေးတာဝန်ရှိသူတွေရဲ့ ဘေးအန္တရာယ်ဆိုင်ရာ အရေးပေါ်အခြေအနေ ညွှန်ကြားချက်တွေ၊ သတိပေးချက်တွေကို လိုက်နာဆောင်ရွက်ကြဖို့ NUG က တိုက်တွန်းထားပါတယ်။
ဒါ့အပြင် ထိုင်း၊ ကမ္ဘောဒီးယား နဲ့ မြန်မာပြည်သူတွေဟာ လုပ်ငန်းခွင်တွေမှာ အတူတကွ လုပ်ကိုင် နေထိုင်ကြသည်ဖြစ်ရာ၊ မြန်မာပြည်သူတွေအနေဖြင့်လည်း ဂရုတစိုက်သတိပြုနေထိုင်ကြဖို့ နဲ့ ပဋိပက္ခကို ပိုမိုတင်းမာစေမည့် ပြောဆိုရေးသားမှုတွေ၊ လူမှုကွန်ရက်မှာ မျှဝေခြင်းတွေကို ဆင်ခြင်ကြဖို့ NUG က တိုက်တွန်းထားပါတယ်။
ဒီကနေ့ မနက်ပိုင်းက စတင်ပြီး ထိုင်း နဲ့ ကမ္ဘောဒီးယား နှစ်နိုင်ငံအကြား အပြန်အလှန် တိုက်ခိုက်မှုတွေကြောင့် အရပ်သားတွေ ထိခိုက်သေဆုံးမှု၊ ဒဏ်ရာရရှိမှုတွေလည်း ရှိနေပါတယ်။
