တော်လှန်ရေးတပ်တွေ သိမ်းပိုက်ထားတဲ့ မန္တလေးတိုင်းဒေသကြီး၊ သပိတ်ကျင်းမြို့ နေရာအများစုကို စစ်တပ်က ပြန်ထိန်းချုပ်လိုက်တယ်လို့ သိရပါတယ်။
စစ်တပ်က နောင်ချိုမြို့ကို ပြန်လည်သိမ်းပိုက်ပြီး ရက်ပိုင်းအကြာ သပိတ်ကျင်းမြို့ နေရာအများစုကို ပြန်လည်ထိန်းချုပ်နိုင်သွားတာလို့ သိရပါတယ်။
တော်လှန်ရေး ပူးပေါင်းတပ်တွေ သိမ်းပိုက်ထားတဲ့ သပိတ်ကျင်း မြို့ဦးတောင်ပေါ် ဘုရားကုန်း၊ ပြည်သူ့ဆေးရုံ၊ မြို့တော်ခန်းမ အပါအဝင်နေရာများစုကို စစ်တပ် ပြန်လည်ထိန်းချုပ်ထားနိုင်ပြီလို စစ်တပ်ထောက်ခံတဲ့ တယ်လီဂရမ်ချန်နယ်တွေမှာ မနေ့ကတည်းက ရေးသားဖော်ပြကြပါတယ်။
၁၀၂၇ စစ်ဆင်ရေးအတွင်း မန္တလေးတိုင်းဒေသကြီး သပိတ်ကျင်းမြို့ကို တော်လှန်ရေးအင်အားစုတွေက ၂၀၂၄ ခုနှစ် ဩဂုတ် ၂၅ ရက်မှာ တိုက်ခိုက်သိမ်းပိုက်နိုင်ခဲ့တာပဲ ဖြစ်ပါတယ်။
လက်ရှိမှာ စစ်တပ်က ၎င်းတို့ဆုံးရှုံးသွားတဲ့ မြို့တွေကို အင်အားအလုံးအရင်းနဲ့ ထိုးစစ်ဆင် တိုက်ခိုက်လျက်ရှိနေပြီး ရှမ်း-ကယားနယ်စပ် မိုးဗြဲမြို့ကို ဇူလိုင် ပထမပတ်မှာ သိမ်းပိုက်ခဲ့သလို၊ ရှမ်းပြည်မြောက်ပိုင်း နောင်ချိုမြို့ကိုလည်း ဇူလိုင် ၁၆ ရက်နေ့မှာ သိမ်းပိုက်နိုင်ခဲ့တယ်လို့ စစ်တပ်က ထုတ်ပြန်ပါတယ်။
