နာဂကိုယ်ပိုင်အုပ်ချုပ်ခွင့်ရဒေသ နန်းယွန်းမြို့နယ်အတွင်းရှိ အာသံလက်နက်ကိုင်တပ်ဖွဲ့ United Liberation Front of Asom (ULFA) ရဲ့ စခန်းကို အိန္ဒိယစစ်တပ်က တိုက်ခိုက်မှုတွေ ပြုလုပ်နေတယ်လို့ Naga News က ဖော်ပြပါတယ်။
နန်းယွန်းမြို့နယ်၊ နာယန်းကျေးရွာအနီးရှိ အာသံလက်နက်ကိုင်တပ်စခန်းကိုလည်း အိန္ဒိယစစ်တပ်က ဒရုန်းတွေ၊ လက်နက်ကြီးတွေ အသုံးပြုပြီး ဒီကနေ့ ဇူလိုင်လ ၁၃ ရက် မနက် ၂ နာရီအချိန် စတင်ပစ်ခတ်တိုက်ခိုက်ခဲ့တယ်လို့ ဆိုပါတယ်။
ဗုံးကြဲတိုက်ခိုက်မှုဟာ မနက် ၄ နာရီအချိန်အထိ ကြာမြင့်ခဲ့ပြီး ဗုံးအလုံးရေ ၄၀ ကျော် ကြဲချတိုက်ခိုက်ခဲ့ပြီး ကြိုတင်သတင်းရရှိထားတာကြောင့် လူအသေအပျောက် မရှိခဲ့ကြောင်း ဆိုပါတယ်။
အလားတူ လဟယ်မြို့နယ်အတွင်းရှိ အာသံလက်နက်ကိုင်တပ်ဖွဲ့ (ULFA) ရဲ့ စခန်းတစ်ခုလည်း ဒီကနေ့မနက်ပိုင်းမှာ တိုက်ခိုက်ခံခဲ့ရတယ်လို့ ဆိုပါတယ်။
အာသံလက်နက်ကိုင်တပ်ဖွဲ့ United Liberation Front of Asom (ULFA) ဟာ အိန္ဒိယအစိုးရကို ဆန့်ကျင်တိုက်ခိုက်နေတဲ့ လက်နက်ကိုင်တပ်ဖွဲ့ဖြစ်ပြီး မြန်မာ – အိန္ဒိယနယ်စပ်မှာ အခြေပြုလှုပ်ရှားလျက်ရှိပါတယ်။
အဆိုပါ နာဂကိုယ်ပိုင်အုပ်ချုပ်ခွင့်ရဒေသအတွင်း နာဂအမျိုးသားဆိုရှယ်လစ်ကောင်စီ-အန်းမိုင်(NSCN-AM)၊ နာဂအမျိုးသားဆိုရှယ်လစ်ကောင်စီ-ယုံးအောင် (NSCN-YA)၊ ရှမ်းနီအမျိုးသားများတပ်မတော် (SNA) စတဲ့တပ်ဖွဲ့တွေလည်း စစ်ရေးလှုပ်ရှားလျက်ရှိတယ်လို့ သိရပါတယ်။
