တအာင်းတပ် (TNLA) ထိန်းချုပ်ထားတဲ့ သျှမ်းပြည်မြောက်ပိုင်း ကျောက်မဲမြို့ကို စစ်ကောင်စီတပ်က လေကြောင်းနဲ့ ထပ်မံဗုံးကြဲတိုက်ခိုက်တာကြောင့် အမျိုးသား ၁ ဦး သေဆုံးခဲ့ပြီး ၅ ဦး ထိခိုက်ဒဏ်ရာရရှိခဲ့တယ်လို့ သိရပါတယ်။
ဒီကနေ့ မနက် ၃ နာရီဝန်းကျင်မှာ ဂျက်ဖိုက်တာနဲ့ ကော်လီဟိုတယ်၊ မြို့မရဲစခန်းနဲ့ ခရိုင်ရဲရုံးဘက်တို့မှာ ဗုံး ၃ လုံး လာရောက်ကြဲချတိုက်ခိုက်ခဲ့ကြောင်း၊ အဆိုပါ တိုက်ခိုက်မှုကြောင့် အမျိုးသား ၁ ဦး သေဆုံးခဲ့ပြီး အမျိုးသမီး ၁ ဦးနဲ့ အမျိုးသား ၄ ဦး ထိခိုက်ဒဏ်ရာရရှိကာ နေအိမ် ၄ လုံး ထိခိုက်ပျက်စီးသွားတယ်လို့ TNLA က ထုတ်ပြန်ပါတယ်။
အလားတူ မနေ့လည်း မိုးကုတ်မြို့၊ ပန်မထိပ်ကျေးရွာကို စစ်ကောင်စီတပ်က ဂျက်ဖိုက်တာနဲ့ ပေါင် ၂၅၀ ဗုံး ၂ လုံး ထပ်မံလာရောက်ကြဲချမှုကြောင့် ကလေးငယ် ၂ ဦး သေဆုံးခဲ့ပြီး ကလေးငယ် ၂ ဦး၊ အမျိုးသား ၂ ဦးနဲ့ အမျိုးသမီး ၄ ဦး ထိခိုက်ဒဏ်ရာရရှိကာ နေအိမ် ၇ လုံး ထိမှန်ပျက်စီးသွားတယ်လို့ ဆိုပါတယ်။
စစ်ကောင်စီတပ်ဟာ၂ ပတ်အတွင်း လေကြောင်းနဲ့ ကျောက်မဲမြို့မှာ ၄ ကြိမ်၊ နောင်ချိုမြို့နယ် သုံးဆယ်ကျေးရွာမှာ ၁ ကြိမ်၊ မိုးကုတ်မြို့မှာ ၁ ကြိမ်နဲ့ သီပေါမြို့မှာ ၁ ကြိမ် စုစုပေါင်း ၇ ကြိမ် လာရောက်ဗုံးကြဲတိုက်ခိုက်ခဲ့တယ်လို့ ဆိုပါတယ်။
အဆိုပါ ဗုံးကြဲတိုက်ခိုက်မှုတွေကြောင့် ကလေးငယ်အပါအဝင် ပြည်သူ ၆ ဦး သေဆုံးခဲ့ရပြီး ကလေးငယ် ၂ ဦးနဲ့ ပြည်သူလူထု ၂၈ ဦး ထိခိုက်ဒဏ်ရာရရှိခဲ့ကာ နေအိမ် ၅၀ လုံး၊ စာသင်ကျောင်း ၁ ကျောင်း၊ ဘုန်းကြီးကျောင်း ၄ ကျောင်း ဗုံးစထိမှန်ပျက်စီးသွားခဲ့တယ်လို့ ဆိုပါတယ်။
လက်ရှိမှာ TNLA သိမ်းပိုက်ထားတဲ့ နောင်ချိုမြို့ကို စစ်တပ်ဖက်က ပြန်လည်၍ ထိုးစစ်ဆင်တိုက်ခိုက်လျက်ရှိနေတာကြောင့် နှစ်ဖက်တိုက်ပွဲတွေ ပြင်းထန်နေတယ်လို့ သိရပါတယ်။
