စစ်ကိုင်းတိုင်းဒေသကြီး အထက်ပိုင်း ဟုမ္မလင်းမြို့နယ် ဟုမ္မလင်းမြို့ကုတင် ၁၀၀ ဆံ့ ပြည်သူဆေးရုံမှာ ပါရဂူဆရာဝန်ကြီးတွေမှ မျက်စိဝေဒနာရှင်တွေအတွက် ဒီကနေ့ ဇူလိုင် ၂၆ ရက်မှာ စ၍ အခမဲ့ ကုသပေးနေတယ်လို့ သိရပါတယ်။
ဒေသတွင်းရှိ မျက်စိဝေဒနာရှင်တွေအတွက် သဲဖြူဆရာတော်ဘုရားကြီး ဦးဆောင်မှုဖြင့် ဟုမ္မလင်းမြို့ သာသနာ့ဇောတိကမြို့မကျောင်း ဆရာတော်ဘုရားကြီးမှ ကြီးကြပ်ကွပ်ကဲ၍ ပါရဂူဆရာဝန်ကြီးတွေမှ လာရောက် ကုသပေးမှာဖြစ်ကြောင်း သက်ဆိုင်ရာ အဖွဲ့အစည်းတွေထံက သိရပါတယ်။
မျက်စိဝေဒနာရှင်တွေကို မျက်စိစစ်ဆေးတာ၊ ခွဲစိတ်ကုသတာတွေ ဆောင်ရွက်သွားမှာဖြစ်ပြီး ရပ်နီးရပ်ဝေးမှ မျက်စိဝေဒနာရှင်တွေ အခမဲ့လာရောက်ပြသ ကုသနိုင်သလို ဒီနေ့ ဇူလိုင် ၂၆ ရက်မှာစ၍ ဇူလိုင် ၃၁ ရက်နေ့အထိ ကုသပေးသွားမှာဖြစ်ကြောင်း သိရပါတယ်။
ကုသမယ့် မျက်စိဝေဒနာရှင်တွေအနေနဲ့ ဟုမ္မလင်းမြို့ ချင်းတွင်းဥရုရှမ်းနီလူငယ်ပါရမီစာကြည့်တိုက်မှာ စာရင်းပေးသွင်းနိုင်ပြီး တည့်ခိုဖို့နေရာတွေအတွက် ဟုမ္မလင်းမြို့သီတဂူစက္ခုဒါနဆေးရုံတော်ဝင်းအတွင်း၊ ဟုမ္မလင်းမြို့ ရှမ်းစာပေနှင့်ယဥ်ကျေးမှုရုံး (ကျားနှစ်ကောင်ရှမ်းရုံး)၊ ဟုမ္မလင်း ဘုရားငါးဆူဘုန်းတော်ကြီးကျောင်းအတွင်းတို့မှာ စီစဉ်ထားတယ်လို့ ဆိုပါတယ်။
အဆိုပါ မျက်စိဝေဒနာရှင်တွေအတွက် အခမဲ့ကုသပေးမှုမှာ ရှမ်းနီအမျိုးသားများ တပ်မတော် (SNA) မှ ရဲဘော်တွေ၊ စစ်မေတွေ အပါအဝင် ချင်းတွင်းဥရုရှမ်းနီလူငယ်ကွန်ယက်မှလူငယ်တွေ၊ ဒေသတွင်းလူငယ်တွေနဲ့ စေတနာရှင်ပြည်သူတွေကလည်း မျက်စိကုသမယ့် ဝေဒသနာရှင်တွေ၊ လူနာလိုက်ပါစောင့်ကြည့်သူတွေကို ထမင်း/ဟင်း အခမဲ့ ပေးဝေတာ၊ လုပ်အားပါဝင်ကူညီတာတွေ လုပ်ဆောင်နေတယ်လို့ သိရပါတယ်။
