စစ်ကိုင်းတိုင်းဒေသကြီး အထက်ပိုင်း ဟုမ္မလင်းမြို့နယ် ဟုမ္မလင်းမြို့ကုတင် ၁၀၀ ဆံ့ ပြည်သူဆေးရုံမှာ ပါရဂူဆရာဝန်ကြီးတွေမှ မျက်စိဝေဒနာရှင်တွေအတွက် အခမဲ့ ကုသပေးမှာ ဖြစ်တယ်လို့ သိရပါတယ်။
ဒေသတွင်းရှိ မျက်စိဝေဒနာရှင်တွေအတွက် သဲဖြူဆရာတော်ဘုရားကြီး ဦးဆောင်မှုဖြင့် ဟုမ္မလင်းမြို့ သာသနာ့ဇောတိကမြို့မကျောင်းဆရာတော်ဘုရားကြီးမှ ကြီးကြပ်ကွပ်ကဲ၍ ပါရဂူဆရာဝန်ကြီးတွေမှ လာရောက် ကုသပေးမှာဖြစ်ကြောင်း သက်ဆိုင်ရာ အဖွဲ့အစည်းတွေထံက သိရပါတယ်။
မျက်စိဝေဒနာရှင်တွေကို မျက်စိစစ်ဆေးတာ၊ ခွဲစိတ်ကုသတာတွေ ဆောင်ရွက်သွားမှာဖြစ်ပြီး ရပ်နီးရပ်ဝေးမှ မျက်စိဝေဒနာရှင်တွေ အခမဲ့လာရောက်ပြသ ကုသနိုင်သလို ဇူလိုင် ၂၆ ရက်မှာစ၍ ကုသပေးသွားမှာဖြစ်ကြောင်း သိရပါတယ်။
ကုသမယ့် မျက်စိဝေဒနာရှင်တွေအနေနဲ့ ဟုမ္မလင်းမြို့ ချင်းတွင်းဥရုရှမ်းနီလူငယ်ပါရမီစာကြည့်တိုက်မှာ စာရင်းပေးသွင်းနိုင်ပြီး တည့်ခိုဖို့နေရာတွေအတွက် ဟုမ္မလင်းမြို့သီတဂူစက္ခုဒါနဆေးရုံတော်ဝင်းအတွင်း၊ ဟုမ္မလင်းမြို့ ရှမ်းစာပေနှင့်ယဥ်ကျေးမှုရုံး (ကျားနှစ်ကောင်ရှမ်းရုံး)၊ ဟုမ္မလင်း ဘုရားငါးဆူဘုန်းတော်ကြီးကျောင်းအတွင်းတို့မှာ စီစဉ်ထားတယ်လို့ ဆိုပါတယ်။
ပြီးခဲ့တဲ့ ဇူလိုင် ၁၉ ရက်မှ ၂၂ ရက်နေ့အထိ ရှမ်းနီအမျိုးသားများ တပ်မတော် (SNA)၊ မောင်းခမ်းစံပြကျေးရွာမှ ရှမ်းနီလူငယ်တွေ၊ ချင်းတွင်းဥရုရှမ်းနီလူငယ်ကွန်ယက်မှာ လူငယ်တွေ နဲ့ ခိုပဲဝရပ်ကွက်မှ စေတနာရှင်တွေ စုပေါင်း၍ ဟုမ္မလင်းမြို့ သီတဂူစက္ခုဒါနဆေးရုံတော် အတွင်းအပြင် သန်းရှင်းရေး လုပ်ဆောင်ခဲ့ကြပါတယ်။
